Gulundrinas (Viaje ideal). Publicáu en 1913

A lo largu la vía destendíanse los cables del telégrafu, cumu pentagrama mágicu, onde las negras gulundrinas aposáas amejaban diabólicas notas en pentásticas danzas, arpegiando colos sus empavesaos ganjeos l´himnu jermosu de la su cantata matinal, cumu salmodia d´honor ofrendáa´l nuevu día que nacía por Oriente.

Las diamantinas perlas del rucíu adornaban, formando encantaora diadema, las multicolores florecillas que colas sus abrientes corolas ofrecían un besu d´amor al alba qu´espuntaba.

El tren curría, con anjéu, cumu mostruosa culiebra de jierru, espidiendo´l su negru aliendu que formaba una estela cumu´l crespón lutuosu d´una nochi qu´espiró, triscando la su jérrea musculatura con suníu de martilléu.

Cumu por pantalla cinematográfica asómanse polas ventanillas cuadros de luz y guapura y dalgunos qu´otros árbules paecin pasar al escape cumu guerrilleros del ejércitu vegetal.

El juerti pitar de la locomotora anuncia l´allegáa del vehículu nun túnel. Tolo tapan las tinieblas y l´ecu de los jierros jazse más juerti. Paez qu´empontigamos cara´l infernal abismu. Pasa bien de tiempu. La luz güelvi a besamos. El túnel ha tremináu y el “mostruu” sal ufanu de la su madriguera. El jumu qu´espidi es brancu, cumu si juera inciensu barciáu en loor del sol que ya espardi los sus vivificantes rayos al treslumbri.

El paisaje paez más guapu y jasta las gulundrinas están alegres.

Allegamos.

“Acracia. ¡Una eternidá!”, repiti la potente voz que rebumbia cumu una sentencia.
“¡Libertá, Felicidá, Amor!”, retingla nel espaciu.
Hemos allegáu a la fin del nuestru viaje. Estamos ena Tierra Libri.