Lavapiés

Allego a la plaza de Lavapiés y entro nun bar p´aposar y almorzar, a pesar de ser ya más de las doce. Café, cruasán y jugu de naranja, pon ena puerta: 2,80 euros. "Por favor, un desayuno" pido a la camarera, que visti una tela apaecía a una toga d´algodón y color rosa, cumo las nubes d´azúcara de las rumirías. Curtiu de café, añido, pero en castellanu, asina: "corto de café", pa que lo entienda, porque, sabíu es, en Madrid los cafés se dicin diferente, cumo las cervezas, que nu son cuartos, sino "tercios". No me ponin cubiertos pero no me quejo: está la chica discutiendo con otra tamién vistía con nubes d´algodón, esta vez azulis, y dos chicos, unu baju y cuadráu, negru, y l´otru que paez estar al treslumbri de lu blancu qu´es, toos jolasteros. Paez que a un cunucíu lu han metíu ena cárcel por vender CD´s piratas. El paquete de servilletas está a tresmanu: tendría de pasar por mediu e interrumpir. No lo hago: me enseñarin a ser educáu. Me chumpo los deos de la manu isquierda, primeru, y los de la derecha, dimpués. Polo escuru, adivino qu´el café está fortísmu. Echo un surbiatu. Fortismu y que alampa. El chicu de la cárcel nu tien dineru pa pagar la fianza. Naidi paez lo tener. Güelvo a beber hasta terminar el café y pergunto cuánto es, no sin anantes pidir disculpas por interrumpir. Educáu, siempre.

- 2, 80 euros.
- Pero si nu tomé el jugu de naranja - hago notar.

Entra una avispa y aposa enel vistíu gaseosu de la chica de tres la barra. Quítasela de una manguetáa. Una avispa a mediaos de diciembre.