Jorge (coca), propuesta etimulógica

Ya eran más de las cuatru cuando salí de trabajar. Daba clas a las sieti, asina que tinía despaciu pa dir a casa, echar un gallatu y terminar Cabezas cortadas (Seix Barral, 2018) anantis de la trespuesta.

Estamos nel pisu nuevu dendi tuvía no hará vinti días y siguimos ensin curtinas. Estaba asejáu nel salón liendo y col sol espardiendo los sús rayos en parracil pola casa, el gatu nel mí senáu, cuando évate que levanto la vista y veo a una coca volando partallá de los cristalis, una coca encesa, encesa cumo calda. Y en allegando la coca al cristal, aposa cumo desibiéndosi: era un "jorge".

Y es entonz cuando cudo si no será "jorge" pol santu que aluchó contra´l bichu que alienda juéu, es dicir, contra´l dragón, cunucíu enti nós cumo "cúlebre", coca y santu y bichu asuntáos.

Termino´l libru. No volu arrecumiendo.

Levanta´l vulíu la coca y el sol la escurri hasta´l otru día a la mañana.

Marcho a dar clas. Ha escuricíu.