Caenas

Tengo una subrina de dos años cuasi recién cumplíos. Acaba escubrir los "rinconines". Cuando alcuentra un sitiu ajallaízu, es pa ella un rinconín. Puei ser baju la mesa la cucina, a la sombra un árbul, ect. Clave pa que sea un rinconín es qu´ella lu esté viendo y que haya alguien a quin señaláselu: "mira qué rinconín".

Cuandu críu, la hija d´una amiga de mís padres, un pocu menor que yo, estuvu a puntu de murir porque se metió una caena oru polas ñarices. Daquella alcontré un piazu caena de latón ena calle y la escuendí en un juriacu que bía n´un rodapié del mí cuartu de durmir (vivía ena casa los maestros de Culindris). Allá seguirá. La casa ya nu es una casa. Abora es sée d´un montonal d´asociaciones, Sauga ente ellas.

El mí rinconín.

El mí rinconín lu señaló el miéu a murir. Esi piazu caena ya nu matará a naide, pensé.

Qué verá la mí subrina enos sús rinconines. De qué ajuirá. Qué camientará. Qué caenas espienza a arrastrar.