El casetu´Thoreau

Si me priguntaran pol urigin la arquitectura y me pidieran que pusiera daque ejemplu nu dudaría en arricatar pa Thoreau y apurrir la sú reclusión duenda en un casetu ircíu por él mismu en Walden Pond, Massachusetts, un casetu se supón que remotu, aunque´l carruferril pasara en par de él (me vien a la mimoria los avionis que pasan por cima´l chozu´Jóu´la Colláa, n´Uciea), un casetu, tamién, se supón que primitivu. Y trés Thoreau, a jita, Mahler, Mark Twain, Virginia Woolf, Dylan Thomas, Roald Dahl, George Bernard Shaw, Heidegger, Wittgenstein o Gauguin (que ritrataba un mundu pretendidamente primitivu quiciás a hucias de una metrópoli que alampaba por estetizar el colonialismu al tiempu que lu comblaba de sífilis), toos ellos mitíos enos sús casetos, jedando arrudiáos por cuatru parées de maera podre una moernidá que contradictoriamente, solu en apariencia, quirían tresponer, una moernidá, la suya, de la que quirían asubiase.

Nu hay una primer arquitectura cumu tampocu hay una lengua primigenia. Sólu hay lu que mos imaginamos cumu tal dende´l presente.

Nu hay uríginis, solu porqués.